18-20 mart 2019-cu il tarixində Ağsu rayonunun Gəgəli kəndində IV Beynəlxalq Tərəkəmə Çərşənbəsi Folklor Festivalı keçirilib. Festivalın təşkilatçıları MİRAS Mədəni İrsin Öyrənilməsinə Kömək İctimai Birliyi və Həqiqət Musayev adına Gəgəli kənd ümumi orta məktəbi nəzdindəki Tərəkəmə Folkloru Araşdırma və Təbliğat qrupudur. 

 17-19 yanvar 2019-ci il tarixində Makedoniya Respublikasının Ştruqa şəhərində “Ohrid-Vodiçi - 2019: Kimlik, mədəni irs və turizm müasir gündəlik həyat və qlobal proseslərin əhəmiyyətli elementləri kimi” VII beynəlxalq elmi-praktiki konfrans baş tutmuşdur.

Görülən işləri nəzərə alaraq MİRAS İctimai Birliyinin İdarə Heyəti 9 illik münasibətilə 2019-cu ili "Tərəkəmə ili" elan edir. İl ərzində qışlaqlara, yazlaqlara və yaylaqlara turların təşkil edilməsi, Tərəkəmə Çərşənbəsi Beynəlxalq Folklor festivalı, Tərəkəmələrin yurd görüşü, Tərəkəmə marafonu, Tərəkəmə Oyunları festivalı və s. tədbirlərin keçirilməsi planlaşdırılır. Bu məqsədlə MİRAS İctimai Birliyi maraqlı qrupları, media və özəl sektoru əməkdaşlığa dəvət edir.

Dekabrın 25-də Bakı şəhərində Kitabevim.az kitab mərkəzində tarix elmləri doktoru, professor Qafar Cəbiyevin “Azərbaycan arxeologiyasının əsasları” kitabının təqdimatı keçirilib. Təqdimatda arxeoloqlar, müəllimlər və tələbələr, geniş ictimaiyyətin nümayəndələri iştirak etmişlər. 

Noyabrın 27-də Ağsu rayonu Pirhəsənli kənd tam orta məktəbində "Ağsuda tərəkəmə obaları" araşdırma tanıtım seminarı keçirilib. Seminar Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə icra edilən “Ağsuda tərəkəmə ənənələrinin araşdırılması, kitabın nəşri və seminarların keçirilməsi” layihəsi çərçivəsində aparılan araşdırmaların təqdimatına həsr olunub. 

  09-10 noyabr 2018-ci il tarixdə MİRAS Mədəni İrsin Öyrənilməsinə Kömək İctimai Birliyinin təşəbbüsü, Odlar Yurdu Universiteti, Türkiyənin Kastamonu Universiteti, İtaliyanın YOKOKU Asossiasiyası və Gürcüstan Qafqaz İrsi Araşdırma İnstitutunun dəstəyi ilə Ağsu şəhərində Azərbaycan Xalq Cümhuriyyətinin yaranmasının 100 illiyinə həsr olunmuş Türk Dünyası Dövlətçilik İrsi mövzusunda I Beynəlxalq Ağsu Simpoziumu keçirilib.

25-27 oktyabr 2018-ci il tarixdə Amasiya Universiteti, Azərbaycan Dövlət Pedaqoji Universiteti və onun Şamaxı filialı, AÜSSAM (Amasiya Universiteti Sosial və Strateji Araşdırmalar Mərkəzi), MİRAS Mədəni İrsin Öyrənilməsinə Kömək İctimai Birliyi və AZERDER (Azərbaycan Türkləri Mədəniyyət, İncəsənət və Həmrəylik Dərnəyi) tərəfindən Türkiyə Cümhuriyyətinin Amasiya şəhərində IV Beynəlxalq Həmzə Nigari Azərbaycan Xalq Cümhuriyyətinin quruluşunun 100-cü ilində Türkiyə-Azərbaycan əlaqələri simpoziumu keçirilib.

 13-14 oktyabr 2018-ci il tarixində İsmayıllı rayonunun Talıstan kəndində Azərbaycan Respublikası Təhsil Nazirliyinin Təhsildə inkişaf və innovasiyalar üzrə ikinci qrant müsabiqəsi çərçivəsində İsrayıl Həsənov adına İsmayıllı şəhər 1 nömrəli tam orta məktəbin nəzdində tarix müəllimi Təranə Yusifovanın rəhbərliyi ilə yaradılan məktəblilərin Girdiman bələdçi klubunun “İsmayıllının mədəni irsinin təbliğində bələdçilərin rolu” mövzusunda iki günlük seminar keçirilmişdir.

 Azərbaycan Respublikası Təhsil Nazirliyinin Təhsildə inkişaf və innovasiyalar üzrə ikinci qrant müsabiqəsi çərçivəsində İsrayıl Həsənov adına İsmayıllı şəhər 1 nömrəli tam orta məktəbin nəzdində tarix müəllimi Təranə Yusifovanın rəhbərliyi ilə yaradılan məktəblilərin Girdiman bələdçi klubu İsmayıllı kəndlərində sorğular keçirir və araşdırmalar aparır.

1918-ci ildə Qafqaz İslam Ordusu Azərbaycana yardıma gələrkən qərargah mərkəzlərindən biri iyul ayının 2-dən Ağsu rayonu Padar (Gülmalı) və Külüllü kəndləri arasında hər iki tərəfdən Girdiman çayı ilə əhatələnən Bilal əfəndi məscidində yerləşib. Özünün bu gün də şirin suyu ilə seçilən, Girdiman çayı içərisində əlahiddə ada kimi görünən Bilal əfəndi məscidi qərargah Güzdəyə köçənə qədər demək olar ki, mərkəz olmuşdur. 

22-26 may tarixlərində İtaliya Respublikasının Matera şəhərində "YOKOKU 2018: Mədəni irs sahəsində dialoqlar" mövzusunda VI Beynəlxalq YOKOKU Konfransı keçirilib. Konfransı Mədəni İrsin Konservasiyasında Gənclər - YOKOKU Beynəlxalq Assosiasiyası, İtaliya Milli Tədqiqatlar Şurası Arxeologiya və Abidələr İnstitutu, Bazilikata Universiteti və Kalabriya Universiteti təşkil edib.

May ayının 12-də Türkiyə Cümhuriyyətinin Amasiya şəhərində "Bakıdan Balkanlara Xəlvətilik" III Beynəlxalq Simpoziumu keçirilib. Simpoziumu Gənc Təsəvvüfçüləri Dəstəkləmə və Təkmilləşdirmə Dərnəyi təşkil edib. Türkiyə, Azərbaycan, Makedoniya, Bosniya və Hersoqovinadan 20 alimin sufizm və xəlvətiliyə dair müxtəlif mövzularda məruzəsi dinlənilib.