PİCASP layihəsi çərçivəsində MİRAS İctimai Birliyinin cari il üzrə Tədbirlər Planına əsasən 10 dekabr 2024-cü il tarixində AMEA Məhəmməd Füzuli adına Əlyazmalar İnstitutunda Azərbaycan Turizm və Menecment Universitetinin müəllim və tələbələrindən ibarət 18 nəfərlik heyət üçün paleoqrafik ekspedisiya təşkil edilmişdir. Tədbir zamanı ilk öncə layihənin əlaqələndiricisi Məleykə Hüseynova çıxış edərək Layihə haqqında məlumat vermiş, layihə çərçivəsində həyata keçirilən tədbirlər, o cümlədən müvafiq paleoqrafik ekspedisiyanın məqsədlərindən danışmışdır. Daha sonra İnstitutun Türkdilli əlyazmaların tədqiqi şöbəsinin böyük elmi işçisi, filologiya üzrə fəlsəfə doktoru Şəhla Xəlilli təqdimatla çıxış etmiş, institutun fəaliyyət istiqamətləri, institutda qorunub saxlanan əlyazmalar, onların yaranması, tarixi, növləri və s. barədə geniş məlumat vermişdir. Daha sonra İnstitutun Gigiyena və Bərpa şöbəsinin müdiri Zaur Orucov təqdimatla çıxış etmiş, əlyazma sənəti və onun incəlikləri barədə məlumat vermiş, bərpa laboratoriyasında canlı şəkildə kağızların növləri və işlənmə texnikaları, kitabların cildlənməsi, bərpa üsulları, xəttatlıq sənəti və s. haqqında praktiki dərs keçmişdir. Tədbir çərçivəsində Əlyazmalar İnstitutunun binası üzrə ekskursiya keçirilmiş, iştirakçılara binanın tarixi, orada sərgilənən əlyazmalar və s. haqqında məlumat verilmişdir. AMEA Məhəmməd Füzuli adına Əlyazmalar İnstitutu Hacı Zeynalabidin Tağıyevin tikdirdiyi Qızlar məktəbinin tarixi binasında yerləşir.